Vefurinn víðlesni Business Insider birtir samantekt um þrettán staði sem sagt er að túrismi sé að eyðileggja. Þarna eru Feneyjar sem er sagt að séu að sökkva. Dubovnik þar sem stendur til að setja takmörk á hversu margir ferðamenn mega heimsækja gömlu borgina. Conzumel í Mexíkó sem er næst vinsælasti áfangastaður skemmtiferðaskipa í heiminum. Barcelona þar sem íbúarnir fyrirlíta núorðið ferðamenn. Og svo eru á listanum New York, Machu Picchu, Santorini, Róm, Prag, Amsterdam og Kúba – þar segir að vegna ferðamennskunnar hafi orðið vart við matarskort meðal innfæddra sökum þess að verð á matvöru hefur hækkað mjög.
Og svo er það auðvitað Reykjavík. Borgin birtist núorðið á nær öllum listum um of mikla ferðamennsku. Segir að þrátt fyrir að túrismi hafi verið mikilvæg innspýting fyrir hagkerfið, þá hafi hann þrýst verðlagi upp í hæstu hæðir og það sé alls staðar verið að byggja.
Nú er spurning hvort svonalagað hafi einhver áhrif, en það verður að segjast eins og er – tæplega er þetta mjög góð auglýsing fyrir ferðamannalandið Ísland.
