Þetta er sérlega falleg og hjartnæm ljósmynd sem birtist fyrir stuttu á vefnum Gamlar ljósmyndir. Hreinn Vilhjálmsson setti hana þangað inn og hjá honum fékk ég leyfi til að birta hana.

Myndin sýnir Hrein og tvíburabróður hans Leif. Hún mun vera tekin fyrir um 70 árum, semsagt stuttu eftir stríð. Þeir eru þarna tveir, barnungir, í heilgalla og með prjónahúfu, skóflur í hönd – við sjáum að það er mikið fannfergi.

Hreinn, sem í athugasemdum á vefnum segist vera korteri eldri en Leifur, heldur í hönd bróður síns. Það er mikil frásögn í myndinni –  það er stillt yfir, því er líkast að bræðurnir leiðist áfram til móts við lífið.

Myndin mun vera tekin niður við Kaplaskjólsveg en í bakgrunni er braggahverfið Camp Knox þar sem þeir bræður bjuggu. Á þessum tíma átti fjöldi manns heima í bröggunum í Reykjavík – húsnæðisvandinn hefur sjaldan verið verri. Sums staðar lá illt orð á bröggunum, en þar bjó alls konar fólk, venjulegt fólk, fjölskyldufólk. Það voru meira að segja stofnuð sérstök samtök herskálabúa, eins og þau hétu.

Camp Knox var milli Kaplaskólsvegar og Hofsvallagötu og var fjölmennasta braggahverfið. 1952 var búið þar í 133 bröggum og íbúarnir voru yfir 600 talsins. Síðustu íbúarnir fluttu þaðan 1967 – þá var tími herskálanna liðinn.