Nú er talað um að ef ríkisstjórn Vinstri grænna, Sjálfstæðisflokks og Framsóknar lítur dagsins ljós þá verði seinni hlutann í næstu viku.

Stöðugar viðræður fara fram – flokksformennirnir hafa líka átt fundi með forystufólki í verkalýðshreyfingunni og talsmönnum aldraðra og öryrkja. En það vekur athygli hversu fáir virðast koma að þessum viðræðum – og að sama og ekkert skuli leka út.

Vegna andstöðunnar sem er innan Vinstri grænna, meðal annars í þingflokknum, þarf Katrín Jakobsdóttir að halda spilunum þétt að sér. Dæmið frá því í fyrra kennir að lekar úr stjórnarmyndunarviðræðum geta spillt mikið fyrir.

Við lifum í pólitískum veruleika þar sem sýnd skiptir ekki síður máli en reynd. Það er ekki bara nauðsynlegt fyrir flokkana að gera traustan málefnasamning, heldur þarf að kynna hann þannig að skapist meðbyr og andstaðan verði kveðin niður. Þetta er mikilvægt fyrir bæði Katrínu Jakobsdóttur og Bjarna Benediktsson, máski síður fyrir Sigurð Inga Jóhannsson sem virðist hafa öll ráð í hendi sér í sínum flokki.

Þannig heyrist hvíslað að við fáum hugsanlega „fullveldisstjórn“ 1. desember, fullveldisdagurinn er á föstudaginn í næstu viku. 2018  fara svo fram hátíðarhöld sem teygja sig yfir allt árið vegna 100 ára fullveldisafmælisins.