Saudi-Arabía leikur sér að Bandaríkjastjórn. Þetta skrifar Fareed Zakaria í grein í The Washington Post. Zakaria fjallar um ferð Donalds Trumps til Miðausturlanda þar sem hann seldi Saudum ókjör af vopnum og hafði í hótunum við Írani sem hann sagði að væru uppspretta hryðjuverka.

En þetta stenst ekki skoðun, segir Zakaria. Ofstækisfullar trúarkenningarnar sem eru að baki hryðjuverkum og hafa breiðst út um heiminn koma frá Saudi-Arabíu. Saudar hafa veitt gríðarlegu fé í byggingu moska um víða veröld, meðal annars í Evrópu, þar sem er boðuð harðlínuútgáfa af íslam. Og frá Saudi-Arabíu hafa komið hryðjuverkamenn í stríðum straumum, til dæmis 15 af 21 flugræningjum 11. september 2001.

Hið sama verður ekki sagt um Íran þótt þar sé uppspretta alls kyns ófriðar. Zakaria segir að 94 prósent af dauðsföllum vegna hryðjuverka íslamista séu af völdum ISIS, al-Quaeda og jihadista sem eru sunníar. Einatt sé að finna tengingar við Saudi-Arabíu, ekki Íran, en þar eru shítar ráðandi.

Zakaria heldur því fram að Trump hafi kokgleypt línu Sauda varðandi hryðjuverk, en hún gengur út á að kenna Írönum um. Þannig hafi Bandaríkin undirgengist utanríkisstefnu Saudi-Arabíu sem gengur út á stöðuga baráttu gegn shítum. Þetta muni flækja Bandaríkin í endalausan ófrið og flækja samskiptin við ríki eins og Írak sem vill halda friðinn við báða trúarhópana. Og þetta geri ekkert til þess að lægja hryðjuverkaógnina.

Og að lokum segir Zakaria:

Utanríkisstefna Trumps var að setja Bandaríkin í fyrsta sæti, ekki Saudi-Arabíu.