David Lynch snýr aftur með nýja seríu af Twin Peaks, sem er furðuleg og skemmtileg, í hans anda. Það er rifjað upp að Lynch vildi bjarga Íslendingum eftir hrun eins og kom fram í viðtali í Silfri Egils á sínum tíma. Lynch stundar innhverfa íhugun – það er ekki ofmælt hvað slíkt er gott fyrir sálina á þessum ruglingslegu tímum.

Viðar Víkingsson kvikmyndagerðarmaður hefur verið að horfa á Twin Peaks og skrifar þessa hugleiðingu. Þar heldur hann því fram, sem líklega er rétt, að David Lynch væri rétti maðurinn til að gera mynd um Geirfinnsmálið.

Það er deginum ljósara hversu margt er líkt með Íslendingasögum og samúrajakúltúr Japana. Upp úr miðri síðustu öld spurði Thor Vilhjálmsson í kjölfar þess að hafa séð Rashomon og Yojimbo hvort ekki væri réttast að fá Kurosawa til að koma Njálu og öðrum Íslendingasögum sem best til skila á hvíta tjaldinu. – Nú vaknar hliðstæð spurning upp varðandi Geirfinnsmálið. Eftir að hafa séð nýju Twin Peaks þættina finnst mér liggja í augum uppi að David Lynch sé eini maðurinn sem hefði innsýn í hvað raunverulega gerðist í því máli og gæti gert því sómasamlega skil á myndrænan hátt.