F. W. Murnau er almennt talinn einn af helstu meisturum kvikmyndanna. Hann var þýskur, fæddur 1888, barðist í fyrri heimsstyrjöldinni og hóf að gera kvikmyndir eftir það. Frægasta mynd hans er Nosferatu, ein fyrsta og kannski besta hryllingsmyndin með hinum ógleymanlega Max Schreck í hlutverki Drakúlas.
Önnur fræga mynd sem hann gerði í Þýskalandi er Der letzte Mann, þar sem Emil Jannings leikur dyravörð á lúxushóteli sem missir stöðu sína og er gerður að klósettverði. Missir um leið einkennisbúninginn sem Þjóðverjar bera svo mikla virðingu fyrir og um leið stöðu sína í samfélaginu.
Og svo er það mynd sem hann gerði eftir leikriti Goethes, Fást, líka með stórleikaranum Jannings sem þarna var í hlutverki Mefistófelesar.
Síðan flutti Murnau til Bandaríkjanna og hóf að gera myndir í Hollywood. En tími hans þar varð ekki langur, því Murnau andaðist af sárum sem hann hlaut í bílslysi 1931, aðeins 42 ára. En hann hafði náð að gera Sunrise sem oft er talin með bestu kvikmyndum allra tíma.
En Murnau gerði líka myndir sem eru lítt þekktar. Leikstjórar þögla tímans voru oft mjög afkastamiklir. Ein þessara mynda er Der Gang in die Nacht eða Ferð inn í nóttina sem var gerð 1921. Myndin er byggð á leikriti eftir Harriet Bloch og fjallar um lækninn Dr. Eigil Borne sem er trúlofaður stúlku að nafni Hélene, en á líka í sambandi við dansmærina Lily. Meðal leikara í myndinni er Conrad Veidt sem lék svefngengilinn í þeirri frægu mynd Das Cabinet des Dr. Caligari en líka í Casablanca á móti Bogart.
Lily er leikin af danskri leikkonu sem hét Gudrun Bruun Stephensen. Nafnið hljómar íslenskt og jú, það kemur í ljós að hún var af hinni einu sönnu Stephensen-ætt. Hún hét upprunalega Gudrun Stephensen er giftist manni sem hét Hugo Bruun. Hún var fædd Kaupmannahöfn 1882 en andaðist 1946. Gudrun var dóttir leikhússtjórans Oddgeirs Stephensen, hann var sonur Oddgeirs Stephensen, en hann var Íslendingur, fæddur að Lágafelli, sem náði miklum embættisframa í Danmörku á 19. öld. En svona Gudrun Stephensen út – hún á náttúrlega alnöfnu sem er þekkt leikkona á Íslandi.
Og hér er kvikmyndin sem hún lék í eins og hún birtist á YouTube.
