Hér er dásamleg ljósmynd frá Reykjavík eins og ég man hana á fyrsta áratug lífs míns. Hún er líklega tekin um miðjan sjöunda áratuginn, birtist á vefnum Gamlar ljósmyndir. Maður rekur fyrst augun í litina sem eru oft svo skemmtilega mjúkir í myndum frá þessum tíma.

Myndin sýnir norðurhlið Lækjartorgs, Hafnarstræti og út á Kalkofnsveg. Ég man eftir að hafa verið að selja Vísi á þessu svæði þegar ég var strákur. Það gekk ekki sérlega vel, ég náði aldrei að vera nógu ágengur. En það var einn maður sem sá aumur á mér oftar en einu sinni, þetta var Garðar Ólafsson úrsmiður sem var með verslun í litlu húsunum sem eru fremst á myndinni. Síðan hugsa ég alltaf með miklum hlýhug til Garðars.

Í fjarska má sjá Sænska frystihúsið, stórbyggingu sem var rifin til að rýma fyrir húsi Seðlabankans. Litla húsið við hliðina á turninum sem hefur lengi verið á flakki um þetta svæði var Hreyfilsstöðin en þar rak Pétur Pétursson þulur sjoppu um tíma. Pétur bjó í Ásvallagötunni og var óþreytandi að ræða málin við vegfarendur, líka okkur krakkana. Það varð aldrei neitt af sundlauginni sem hann vildi setja upp í húsasundinu á bak við Ásvallagötuna, en hann bauð mér eitt sinn í söngferð með frönskum drengjakór sem hann hafði flutt til Íslands. Ég man samt ekkert hvert við fórum, í eitthvað félagsheimili úti á landi, þekkingu minni á landafræði var ábótavant í þá daga. Pétur var kvæntur Birnu, hún vann eitt sinn á Veðurstofunni og var sagt að þá hefði alltaf verið gott veður.

Það er furðu mikill borgarbragur á þessari mynd, þótt húsin séu ekki ýkja háreist öll. Þarna má líka sjá gamla Siemsens-húsið sem var endurbyggt í Grófinni og hús þar sem Bílar & landbúnaðarvélar höfðu starfsemi. Á þessum árum var Lækjartorg enn miðstöð samgangna í Reykjavík. Við sjáum að á myndinni eru tveir strætisvagnar. Þarna ók Njálsgata-Gunnarsbraut, ein af leiðunum sem var til áður en kerfinu var breytt í kringum 1970. Ég var í Ísaksskóla og tók stundum strætó þangað, hef varla verið nema sjö ára.

Þetta svæði er hálfgerð eyðimörk nú, enda búið að rífa öll hús nema þau sem eru aftast á myndinni. Í staðinn á að reisa hið svonefnda Hafnartorg. Ég er ekki viss um að verði skemmtilegri bragur yfir því en sá sem má sjá myndinni.