Þetta er dagurinn þegar gengur á með bréfaskriftum.

Sigmundur Davíð skrifar á vefsíðu sína og heldur fast við þann málflutning að umræða um Tortólapeningar séu árás á konu hans. Þetta hefur verið viðkvæðið hjá Framsóknarmönnum síðan þeir stukku til og komu sjálfir upp um málið – áður en fjölmiðlar næðu að fjalla um það á sínum eigin forsendum. Sigmundur talar um „fórnfýsi og heiðarleika“ konu sinnar – en kannski er það ekki alveg um það sem ræðir hér.

Hann segir lika að konan sín sé ekki „hrægammur“. Það er orð sem var mjög frjálslega notað á sínum tíma. Það á varla við hérna, en þetta er samt mál sem veikir forsætisráðherrann pólitískt – og var hann þó veiklaður fyrir. Þar kemur bæði til sá grunur sem vaknar að hjónin vilji ekki deila kjörum með íslensku þjóðinni sem situr uppi með gjaldmiðlinn krónu sem Sigmundur hefur mært svo mjög, býr við mikinn efnahagslegan óstöðugleika – er þá eftir allt betra að hafa sitt á Tortóla? – og eins eru þarna hagsmunatengsl vegna krafna í íslenska banka sem hefðu þurft að koma fram á sínum tíma.

Margir bandamenn Sigmundar úr baráttunni eftir fall bankanna eru undrandi yfir þessu og sárir út í hann.

Það er ekki til vestrænt ríki þar sem svona uppjóstrun hefði ekki orðið fréttamál. Það er fráleitt að ímynda sér annað.

Kári Stefánsson skrifar bréf í Fréttablaðið – um Sigmund Davíð. Það er líklega rétt hjá framsóknarþingmanninum sem segir að Sigmundur eigi ekki að svara, eiginlega er það hollráð. Kári veður úr einu í annað, reynir að sparka eins fast og hann mögulega getur. Mætti jafnvel segja að þetta sé það sem á ensku kallast rant. Andstæðingar Sigmundar gleðjast hins vegar óskaplega, þeir eru fjölmargir og deila greininni fagnandi á Facebook.

Það fór reyndar lítið fyrir því að um daginn lýsti Kári því yfir að Íslendingar séu að verða vitlausari. Hann sagði að Íslensk erfðagreining stæði í mikilli rannsókn þar sem væri sýnt fram á þetta. Ástæðan væri sú að menntað fólk, les yfirstéttin, eignaðist færri börn, en ómenntaða fólkið, les lágstéttin, eignaðist fleiri börn.

Semsagt vitleysingarnir væru að taka yfir.

Það verður gaman að sjá þegar þessi rannsókn birtist, hver aðferðafræðin er og hvernig tekst að mæla heimskuna – þá ekki síst í samanburði við fyrri kynslóðir.