John Kerry, utanríkisráðherra Bandaríkjanna ræður Bretum frá því að ganga út Evrópusambandinu. Það kemur svosem ekki á óvart – Bandaríkin hafa alla tíð frá því í seinni heimsstyrjöld verið hlynnt sameinaðri Evrópu þar sem ríkir stöðugleiki.

En þessa dagana eru Bandaríkin kannski ekki að gera mikið til að Evrópa tolli saman. Kerry sagði líka nýskeð að flóttamannavandinn ógnaði sjálfri tilvist Evrópu.

Ástandið hefur vissulega súrnað mjög síðan síðastliðið sumar þegar sum Evrópuríki kepptust við að bjóða flóttamenn velkomna. Það er farið að loka landamærum , Grikkjum er jafnvel hótað að norðurlandamærum þeirra verði skellt aftur svo flóttamenn komist ekki áfram norður.

Eitt af vandamálunum er í raun ábyrgðar- og afstöðuleysi Bandaríkjanna. Þau bera einna mesta sök á ástandinu í Sýrlandi og Írak, en straumur flóttamanna liggur um Evrópu, frá Grikklandi og norður. Bandaríkjamenn hafa gert sáralítið til að hjálpa við að leysa þennan vanda. Það er skammarlegt, ef litið er á framferði þeirra í Mið-Austurlöndum frá tíma Íraksstríðsins.

Hinum megin eru svo Rússar sem hella sprengjum á Sýrland eins og enginn sé morgundagurinn og magna þannig upp flóttamannastrauminn. Því er líkast að Pútín líki þetta ágætlega. Þannig nær hann að sundra Evrópu og styrkja pópúlíska stjórnmálamenn í Evrópu sem eru handgengnir honum.

Evrópuríkin sem verða fyrir bylgju flóttamanna bera mörg hver ekki minnstu ábyrð á þessari stöðu. En þau sitja uppi með vandann og er gert að leysa hann.  Á endanum er það aðeins hægt með alþjóðlegu átaki. Eitt og eitt ríki getur lokað sig af, en það mun aðeins gera ástandið verra.