Í gær bættist Pétur Blöndal í hóp þeirra sjálfstæðismanna sem lýsa yfir efasemdum um peningastefnu Seðlabankans og var þar nokkuð samhljóma því sem Ingibjörg Sólrún sagði í ræðu um helgina.

Í dag er röðin komin að öðrum þingmanni flokksins, Guðfinnu Bjarnadóttur.

Guðfinna segir í grein sem birtist í Blaðinu í dag að evran sé á dagskrá, nauðsyn sé að ráðast gegn óstöðugu gengi krónunnar og háum vöxtum. Guðfinna gefur ESB-aðild jafnvel undir fótinn:

„Við þurfum að taka umræðuna um evru og ESB út úr skotgröfum vanþekkingar og þegar þar að kemur og velja eða hafna ESB-aðild á faglegum forsendum sem byggja á þróaðri umræðu. Stjórnvöld hljóta að taka virkan þátt í þessari mikilvægu umræðu.“