Ég hef verið að halda því fram hér á síðunni að sjálfstæðismenn séu smátt og smátt að gera sér grein fyrir því að krónan sé ekki lengur nothæf – að það sé að verða viðhorfsbreyting í flokknum. Í þessu tilliti var ráðstefna Rannsóknarstofnunar um efnahagsmál sem haldin var nýskeð mjög mikilvæg. Þar hlustuðu hugmyndafræðingar úr Sjálfstæðisflokknum á erindi þar sem því var haldið fram að Íslendingar gætu tekið upp evruna án þess að ganga í Evrópubandalagið.

Margt bendir til þess að þessi stefna verði lendingin innan Sjálfstæðisflokksins – að minnsta kosti tímabundið. Ég skemmti mér við að kalla þetta valgerðarisma – Valgerður Sverrisdóttir setti fram svona hugmyndir en þá heyrðust miklar hneykslunarraddir úr Sjálfstæðisflokknum.

Í grein sem birtist í nýjasta hefti hins merka tímarits Þjóðmála má sjá að Björn Bjarnason er alvarlega að spekúlera í þessum hugmyndum. Hann segir:

„Eftir að hafa hlustað á erindi þessara þriggja erlendu ræðumanna, var öllum áheyrendum þeirra ljóst, að ekkert væri, að þeirra mati, því til fyrirstöðu, að íslenska krónan hyrfi úr umferð og Íslendingar tækju upp aðra mynt, ef þeir sjálfir kysu – í raun þyrfti hvorki að spyrja kóng né prest utan Íslands.“

Og ennfremur segir Björn – og virðist bara vera furðu sammála því sem Björgvin G. Sigurðarson viðskiptaráðherra hefur verið að segja:

„Fyrir stjórnvöld er spurningin þessi: Ætla þau að láta viðskiptalífið og fyrirtæki, sem starfa að mestu erlendis leiða umræðuna um gjaldmiðilinn eða hafa þar sjálf forystu? Því má ekki gleyma, að þessi fyrirtæki uxu úr grasi í skjóli krónunnar.

Inntak umræðna um evru mun breytast eftir ráðstefnu RSE. Nýjasta goðsögnin um nauðsyn aðildar aðildar að Evrópusambandinu er horfin. Málsvarar ESB-aðildar geta ekki lengur notað evruna sem gulrót.“