Allt bendir til þess að framinn hafi verið skelfilegur réttarfarsglæpur gegn ungum manni, Birgi Pál Marteinssyni, sem færeyskur dómstóll dæmdi í sjö ára fangelsi fyrir aðild að svokölluðu Pólstjörnumáli.

Á bloggsíðu Þórðar Más Jónssonar má lesa um þetta mál, en einnig var fjallað um það í Kastljósi í vikunni.

Þórður skrifar:

„Jafnvel þó að í Færeyjum sé farið eftir öðrum reglum en við eigum að venjast hér á landi ber færeyskum yfirvöldum að virða ákvæði MSE. Verður að telja nokkuð líklegt að það hafi ekki verið gert í máli Birgis Páls Marteinssonar. Ljóst er að baráttan við fíkniefni er gríðarlega mikilvæg og nauðsyn þess að sú barátta beri árangur verður seint vanmetin. Hins vegar má hún ekki snúast upp í að menn séu dæmdir í refsingu fyrir brot sem menn hafa ekki framið eða, eins og í máli Birgis, að menn séu dæmdir fyrir miklu alvarlegri glæp en þeir hafa framið. Slíkt ætti að vera óásættanlegt í hvaða vestræna réttarríki sem er. Það væri að öllum líkindum rík ástæða fyrir Birgi til þess að láta reyna á það fyrir Mannréttindadómstól Evrópu hvort réttur hafi verið brotinn á honum samkvæmt MSE.“