Kristján Guy Burgess, hinn nýi aðstoðarmaður Össurar Skarphéðinssonar hefur rekið ráðgjafafyrirtæki sem kallast Global Center og var stofnað 2005.

Það hefur starfað náið með Ólafi Ragnari Grímssyni og útrásarvíkingum. Fjármagn til starfseminnar hefur meðal annars komið úr útrásinni.

Í ævisögu Ólafs Ragnars eftir Guðjón Friðriksson er fjallað um Global Center, sem þar er nefnt Alþjóðaver. Segir þar að Alþjóðaverið hafi starfað náið með forsetanum að ýmsum verkefnum og farið með honum í fjölmargar ferðir til útlanda – og einnig að það hafi unnið með Björgólfi Thor Björgólfssyni, Róbert Wessman og fleiri forystumönnum í viðskiptalífinu.

Kristján hafi líka á undanförnum misserum starfað að verkefnum á vegum utanríkisráðuneytissins og iðnaðarráðuneytisins.

Loks segir að Alþjóðaverið sé öðrum þræði eins konar leynivopn forseta Íslands.  Vegna mannfæðarinnar á forsetaskrifstofunni hafi það geta sinnt ýmsum nauðsynlegum verkefnum sem forsetinn hafi haft frumkvæði að eða gengist fyrir.  Segja megi að Ólafur Ragnar, Örnólfur Thorsson og Kristján myndi þríeyki sem vinnur náið saman að mörgum málum.