Einu sinni var sífellt verið að fella gengið vegna útgerðarinnar. Þá fengu útvegsmenn meira fyrir fiskinn í krónum talið. Þetta gerði starfsskilyrði annarra atvinnugreina á Íslandi mjög erfið.

En sjávarútvegurinn gekk fyrir. Hann gat vælt út krónufall hjá stjórnvöldum. Þess vegna var einn forystumaður útvegsmanna kallaður „grátkona þjóðarinnar“.

Nú hefur krónan rýrnað miku meira en nokkru sinni á tíma gengisfellinga.

En þá ber svo við að þetta hjálpar í raun ekki útgerðinni lengur.

Hún er svo skuldsett að áhrifin eru eiginlega þveröfug.

Samkvæmt sérfræðingi á sjávarútvegssviði Glitnis skuldar sjávarútvegurinn meira en 500 milljarða króna. Og hann bætir við í samtali við Morgunblaðið:

»Jafnvel þótt EBITDA [rekstrarafgangur fyrir skatt og afskriftir] verði í kringum 45 milljarðar á þessu ári skulda fyrirtækin í greininni meira en tífalda þá upphæð,« segir Kjartan Ólafsson, forstöðumaður sjávarútvegssviðs Glitnis. Hann segir að eigið fé sé því ekki mikið og ekkert fjármagn sé hjá fyrirtækjunum til þess að greiða arð eða fara í fjárfestingar.