Samkvæmt þessari frétt í Morgunblaðinu hyggjast Jón Ásgeir og félagar fara í skaðabótamál vegna yfirtöku ríkisins á Glitni. Þeir ætla að gera þetta í nafni hins fræga útrásarfyrirtækis FL-Group/Stoða.

Ég held reyndar að þeir séu að djóka nema kannski þeir haldi að með þessu styrki þeir samningsstöðu sína.

Það má minna á að mál Stíms sem tengist þessum aðilum er – væntanlega – til rannsóknar. Það fjallar um stórfelldar blekkingar í þeim tilgangi að halda uppi fölsku verði á hlutabréfum í FL-Group og Gltitni.

Og að FL-Group/Stoðir er einnig til rannsóknar vegna mála sem tengjast óhóflegum rekstrarkostnaði og einbeittum vilja stjórnenda til að mjólka fjármagn úr félaginu til eigin nota.

Í greininni koma einnig fram hugmyndir um hvernig eigi að skera FL-Group/Stoðir niður úr snörunni. Félagið skuldar 252 milljarða sem hlýtur að teljast ótrúleg fjárhæð.

Ég minni á orð Gylfa Magnússonar hagfræðings sem hefur sagt að ekki eigi að bjarga stóru eignarhaldsfélögunum enda hafi þau verið meinsemd í íslensku efnahagslífi:

„Ég get tekið undir það sjónarmið að ekki sé sanngjarnt að bjarga fjárfestingarfélögum með lánalengingum, eða breytingu skulda í eignarhluti, eins og öðrum fyrirtækjum sem eru í verðmætasköpun og skapa fólki atvinnu. Það er erfitt að sjá réttlætinguna fyrir því að halda einhverjum eignarhaldsfélögum gangandi. Það má benda á að þessi félög og eignatengsl þeirra á milli voru ein af meinsemdunum í gamla hagkerfinu sem gerðu það ógagnsætt og drógu úr samkeppni.„