Nú lítur allt út fyrir að framkvæmdir við tónlistarhúsið stöðvist.

Jónas Kristjánsson sagði reyndar að við ættum að varðveita bygginguna eins og hún er.

Þetta yrði þá okkar Gedächtniskirche, sbr. þá sem stendur í Berlín.

Ég hef reyndar haft áhyggjur af því að húsið væri fullmikið barn síns tíma.

Góðærislegt glerhýsi. Líkt og svo mörg önnur hús sem hafa verið byggð í heiminum síðustu árin. Ekki síst í Reykjavík.

Og að það færi heldur ekki vel að hafa svona mikið gler þarna úti við sjóinn þar sem gnauða saltvindar.

Einhvern tíma benti ég á að besta tillagan í samkeppninni um tónlistarhúsið hefði verið eftir franska arkitektinn Jean Nouvel.

Hugmynd hans var að húsið yrði eins og hóll í laginu – íslenskur hóll.

Þetta fékk ekki brautargengi.

Var líklega of djarft. Og ekki nógu góðærislegt.