Umhverfisverndarsinnar gerðu sér ferð í Þjórsárver í gær og boðuðu baráttu gegn Norðlingaölduveitu. Yfirskriftin er að á hálendinu slái hjarta landsins.

Maður hélt reyndar miðað við síðustu atburði að það væri í Vatnsmýrinni.

En baráttan á að snúast um að hálendinu verði hlíft, eins og segir.

Það er samt staðreynd sem er ekki sérlega mikið flaggað af umhverfisverndarsinnum að Norðlingaölduveita í þeirri mynd sem Landsvirkjun vill byggja hana er langt frá Þjórsárverum og skaðar þau ekki á neinn hátt. Það er því í raun ruglandi að tengja hana Þjórsárverum með þessum hætti – og kannski ekki alveg málefnalegt.

Norðlingaölduveitu í núverandi mynd fylgir miklum minna rask en var í þeirri mynd veitunnar sem var rædd í fyrir rúmum áratug. Þessu er vart saman að jafna. Og veitan hefði þau áhrif að afkastageta virkjananna við Þjórsá myndi aukast verulega – þannig að nemur heilli nýrri vrkjun

Þetta er semsagt mjög hagkvæmur virkjanakostur og hann er á svæði þar sem eru margar virkjanir, þannig að tæplega er hægt að tala um ósnortið land. Um þetta skrifaði orkubloggarinn Ketill Sigurjónsson fyrir nokkru:

„Já – fossunum neðan Norðlingaöldu var fórnað á sínum tíma með Kvíslaveitu og eru nú varla svipur hjá sjón. Í huga Orkubloggarans er ekki mikið náttúruverndargildi í slíkum fölnuðum fossum. Og þar sem Norðlingaöldulónið yrði þar að auki talsvert langt utan Þjórsárvera, eru öll helstu rök gegn Norðlingaölduveitu fallin.

Þar að auki er Norðlingaölduveita, sem fyrr segir, einhver allra ódýrasti kosturinn á Íslandi öllu til raforkuframleiðslu. Þegar allt er saman tekið þykir Orkubloggaranum rökin að baki því að stöðva Norðlingaölduveitu vera ansi veik og horfa framhjá skynsamlegri forgangsröðun virkjunarkosta á Íslandi.“