Hún er skrítin umræðan um uppbygginguna á Landsímareitnum.

Borgarfulltrúi VG heldur því fram að deiliskipulag svæðisins hafi verið samþykkt „í kyrrþey“. Samt man maður varla eftir framkvæmdum í borginni sem hafa fengið meiri umræðu.

Ég sá að einn forsprakki mótmælenda sagði í dag að ekki yrði sól á Austurvelli eftir klukkan hálf þrjú um daginn. Bíðum nú við – eru menn alveg orðnir áttavilltir í Reykjavík?

Samkvæmt þessu var í dag myrkur um miðjan dag á Austurvelli.

Svo virðast margir enn halda að eigi að rífa gamla Kvennaskólahúsið – sem er af og frá. Það er verndað í bak og fyrir.

Einn partur af umræðunni lýtur að Alþingi, að ekki megi þrengja að því. En þrengslin eru ekki meiri en svo að Alþingi hefur breitt starfsemi sína út um alla Kvosina, hefur skrifstofur í heilli húsalengju í Austurstræti og er komið alla leið út í Morgunblaðshús.

Það er talað um að halda eigi íbúakosningu um málið? En hvernig getur hún farið fram. Eiga allir Reykvíkingar að kjósa, eða kannski bara íbúar í 101 – eða þá bara þeir sem búa í Kvosinni?

Staðreyndin er sú þetta svæði er skelfing dapurt. Þar örlar ekki á lífi núorðið. Þarna standa hálftóm stórhýsi, bílastæði og ekkert sem dregur fólk að. Tónleikastaðurinn Nasa er löngu búinn að loka – fyrir honum fór eins og mörgum öðrum stöðum sem komu á undan. Dr. Gunni rekur það í ágætum pistli á vefsíðu sinni.