Eitt af því sem manni hefur fundist furðulegt í pólitískri umræðu síðasta árið er að vinstrimenn skuli hlaupa í vörn fyrir Pútín Rússlandsforseta.

Það liggur við að maður haldi að þetta sé ósjálfrátt taugaviðbragð – Pútín setur sig upp á móti Bandaríkjunum og því hljóti hann að vera góður.

En stjórnmálastefnan sem Pútín gælir við heitir fasismi. Vinstri menn töldu lengi að af öllu illu væri fasisminn verstur.

Pútín tekur sér stöðu með afturhaldssamri kirkju, hann ofsækir fólk sem er öðruvísi (samkynhneigða), hann þrengir stöðugt að tjáningarfrelsinu.

Það er enda svo að ysta hægrið í Evrópu er hrifið af Pútín. Allt frá Farage í Bretlandi yfir til Gylltrar dögunar í Grikklandi.

Nú er líka komið á daginn að stjórn Pútíns veitir fé til öfgahægriaflanna í Evrópu. Undanfarna daga hefur mikið verið fjallað um 9 milljón evra lán sem Þjóðfylkingin franska, undir stjórn Marine Le Pen, fékk frá Rússlandi.

Því er líka haldið fram að Rússar hafi látið Gyllta dögun fá fé, sem og Norðurbandalagið á Ítalíu, Jobbik í Ungverjalandi og Vlaams Belang í Belgíu. Allt eru þetta flokkar yst á hægri væng stjórnmálanna – sumir geta beinlínis talist vera fasistar – og eru andsnúnir Evrópusambandinu.