Danski bloggarinn Mads Holger greinir týpurnar í athugasemdum vefmiðla í bloggfærslu hjá Berlingske.

Þarna eru Einsmálsmaðurinn, Flokksdindillinn, Meðhlauparinn, Mannætan, Samsæriskenningasmiðurinn, Eltihrellirinn (sem Holger kennir við Simon Wiesenthal), Villuleitandinn, Fávitinn, Hinn frelsaði og Mannhatarinn.

Margt af þessu kannast ég við eftir að hafa skrifað á netið í næstum fimmtán ár.

Einsmálsmaðurinn fer alltaf að tala um kvótakerfið eða að allt sé Bandaríkjunum að kenna.

Flokksdindillinn mælir allt á kvarða flokkapólitíkur – og í huga hans eru allir sem eru ekki sammála honum að ganga erinda annarra stjórnmálaflokka.

Samsæriskenningasmiðurinn er þeirrar skoðunar að allir stjórnmálamenn séu eins – það er sama rassgatið undir þeim öllum.

Eltihrellirinn birtist allt í einu á vefnum, hamrar alltaf á því sama og sleppir ekki takinu – og setji maður hann í straff birtist hann bara annars staðar með sama málflutning. Hann gleymir aldrei neinu.

Fávitinn hefur yfirleitt ekki lesið það sem hann gerir athugasemdir við – og hann fer strax út í ad hominem.

Svona mætti halda lengi áfram. Fleiri tillögur?