Hinn feiknarlega bragsnjalli Bjarki Karlsson hefur sett saman rímu um „Lúðvík Sverrisson“, þ.e. Luis Suarez. Þetta er án efa það besta sem hefur verið sagt um málið hér – og í gervallri heimspressunni. Þetta birtist á Facebook – ég tek mér það bessaleyfi að birta þessa kafla úr rímunni. Bjarki tekur fram, í rímunni sjálfri, að þetta sé stæling á Fjósarímu Þórðar á Strjúgi.

11. Boðið var í boltasveit
býsna snjallur þótti,
marga lék á, marga beit
marga dauðinn sótti.

12. Ýmsir sögðu um þumba þann:
þar fer heimsins besti;
bara ef gæti hamið hann
hina slæmu lesti.

13. Síðan reyndi Sverris bur
sína fíkn að hemja
í hart nær sjö ár hékk hann „þur“
„holdsins fýsn“ að temja.

––––––

14. Knattleikni og klækjager
kraft og færni og heppni
þarf að hafa er haldið er
í heimsmeistarakeppni.

15. Kostum þeim fór öllum á
Úrúgvæ til sóma
við andstæðingum Suarez sá
sigur- hafði -ljóma.

16. En ekki mátti af‘onum
í örskotsstundu líta
Giorgio, graman rum
gekk í öxl að bíta

17. Firðar blésu: fuss og svei!
Fésbók skalf af kliði.
Hetjur boltans hafa ei
haft svo vonda siði:

– – – –

18. Hvergi sparði að spyrna í net
spilaði á ukulele,
aldrei fékk sér axlarket
inn á velli Pelé.

19. Eusébio beittur var
beit frá sér – sem þekkt er
hallaðist þó hreint ei par
að Hannibali Lecter.

20. Georg Best í búri sat,
þar Birkir og Cantona töfðu,
aldrei þó í middagsmat
mannaket þeir höfðu.

21. Milli leikja fékkst við forn
fræði, drýgði grúsk, las
en aldrei sást í sára þorn
setja tennur Puskas.

22. Virtist ýmsum þá sem Þór,
þrumuguðinn, æddi
er Maradona mikinn fór;
menn hann aldrei snæddi.

23. Djarfmannlega Dino Zoff
dúndurskotin varði
Kunni að meta malakoff
mannát þó hann sparði.

Og ennfremur:

29. Hemmi Gunn var hress í lund
hafði gott sett tanna
þó hann setti aldrei und
í axlir varnarmanna.

30. Ásgeir Sigurvinson vel
vann úr hverju færi,
aldrei beit þó, að ég tel,
axlir eða læri.

31. Arnór G. og Eiður hans
allvel kunnu að refsa
værukærð hvers varnarmanns
– en voru ekki að glefsa.

32. Löngum kunni Bjarni Ben
að bíta, slá og vega
nú sem fyrr það iðkar – en
ekki bókstaflega.

33. Einar Kára eitt sinn reit
eyjabækur snjallar.
Guðjón Þórðar þennan beit
– en það var utan vallar!