Hér má sjá kort frá Alþjóðaheilbrigðisstofnuninni sem sýnir áfengisneyslu í heiminum, mælda í lítrum á hvern einstakling sem er orðinn meira en fimmtán ára. Þetta birtist á vef Business Insider.

Eins og sjá má skera Rússar og Úkraínumenn sig úr, þeir drekka langmest. Drykkjan á Íslandi er ekki sérlega mikil, hún er undir því sem tíðkast víðast hvar í Evrópu.

Á öðru korti má sjá drykkjusiði, þar eru þjóðir flokkaðar eftir því hversu hættulegar drykkjuvenjur þeirra eru. Þar eru Rússland og Úkraína líka í sérflokki.

Drykkja Rússa er einn helsti áhrifavaldur þess að karlmenn í Rússlandi deyja ungir. 25 prósent rússneskra karlmanna deyja áður en þeir ná 55 ára aldri og eru aðalorsakirnar lifrarsjúkdómar vegna drykkju, áfengiseitrun, ofbeldi eða slys af sem tengjast áfengisneyslu. Þetta kom fram í stórri rannsókn sem var birt í The Lancet fyrr á þessu ári.

Hugsanlega gæti maður orðið margs vísari ef maður læsi þessa bók, Vodka Politics, hún fjallar um drykkju og stjórnmál í Sovétríkjunum og Rússlandi. Hún hefur fengið ljómandi góðar umsagnir.