„Vinstrisinnaðir álitsgjafar boða stríð,“ skrifar Óli Björn Kárason, þingmaður Sjálfstæðisflokksins, í aðsendri grein í Morgunblaðinu í dag. Þar ræðir hann um það að hveitibrauðsdagar nýju ríkisstjórnarinnar verði fáir og að fjölmiðlar séu þegar búnir að setja sig í stellingar og að stjórnarandstaðan muni nýta sér það. „Þeir sem hæst hafa talað um ný vinnubrögð, aukið og betra samtal og samvinnu á Alþingi hafa þegar grafið sér skotgrafir. Áður en ríkisstjórnin hefur formlega tekið við völdum boða Píratar Birgittu Jónsdóttur að hugsanlegt sé, til greina komi og ekki sé ólíklegt að þeir leggi fram vantraust á ríkisstjórnina þegar þing kemur saman síðar í þessum mánuði,“ skrifar Óli Björn.

Hann segir að hægt sé að hafa samúð með Pírötum sem fengu vinveitta erlenda blaðamenn til landsins á meðan skoðanakannanir bentu til að þeir myndu sigra kosningarnar en að úrslitin hafi þvert á móti sýnt kosningasigur sjálfstæðismanna. Því séu Píratar í sárum. Óli Björn skrifar:

Birgitta Jónsdóttir var með það á hreinu hver bæri ábyrgðina á að vinstristjórn varð ekki að veruleika; Vinstri græn undir forystu Katrínar Jakobsdóttur. Í samtali við Stundina 14. desember sagði leiðtogi Pírata:

„Mér sýnist nú, því miður, VG hafa ákveðið að taka sleggju og lemja sundur brúna sem við náðum að byggja á milli fólks.“

Í umræðum á Facebook-síðu Birgittu um áramótin tók gamall samherji hennar til máls. Þór Saari, frambjóðandi Pírata og fyrrverandi þingmaður Borgarahreyfingarinnar og Hreyfingarinnar, var síður en svo hress með fréttir um að hafnar væru viðræður milli Sjálfstæðisflokks, Bjartrar framtíðar og Viðreisnar um ríkisstjórn. Og auðvitað bar Katrín Jakobsdóttir ábyrgðina:

„Þessi hægri stjórn, langt, langt, langt til hægri er í boði Vinstri-grænna og þá sérstaklega Katrínar Jakobsdóttur. Það var meira að segja hálendisþjóðgarður í boði en VG sagði nei. Vinstri hvað? Grænt hvað? Megi þetta duglausa eiginhagsmunalið fara sömu leið og Samfylkingin í næstu kosningum.“

Almenningur jafnt sem stjórnarliðar hafa því fengið smjörþefinn af því hvernig Píratar ætla að haga störfum sínum á Alþingi á kjörtímabilinu. „Nýju vinnubrögðin“ hafa verið ákveðin og „samtalið“ verður markað upp- og úthrópunum. Það verður forvitnilegt að fylgjast með hvort og þá hvernig stjórnarandstöðunni tekst að stilla saman strengi sína í samvinnu við Pírata.

Börkur Gunnarsson