Stjórnarsáttmáli þriggja flokka ríkisstjórnar Sjálfstæðisflokks, Viðreisnar og Bjartrar framtíðar verður undirritaður eftir hádegi í dag, en það mun að öllum líkindum ekki liggja fyrir fyrr en í kvöld hverjir verða ráðherrar í nýju ríkisstjórninni. RÚV greindi frá þessu í morgun.

Líkt og Eyjan greindi frá í gærkvöldi var stjórnarsáttmálinn samþykktur af flokkunum þremur, Sjálfstæðismenn luku sínum fundi um kl. 21 í gærkvöldi, Viðreisn klukkutíma síðar en Björt framtíð fundaði til rúmlega 23, en rúmur fjórðungur stjórnarmanna í Bjartri framtíð greiddi atkvæði gegn stjórnarsáttmálanum.

Málamiðlun í Evrópumálum

Meðal þess sem kemur fram í stjórnarsáttmálanum er að fyrir lok þings verður lögð fram þingsályktunartillaga um hvort kjósa eigi um áframhaldandi viðræður við Evrópusambandið. Benedikt Jóhannesson formaður Viðreisnar sagði við Fréttablaðið í morgun að augljóst væri að lendingin í Evrópumálunum væri málamiðlun, tók hann fram að hugmyndin hefði komið frá Bjarna Benediktssyni formanni Sjálfstæðisflokksins snemma í viðræðum flokkanna þriggja, en Benedikt sagði niðurstöðuna ásættanlega þar sem það verði þingið sem muni ráða því hvort farið verði í þjóðaratkvæðagreiðslu.

Peningastefna landsins verður endurskoðuð strax í upphafi kjörtímabilsins og að skoðaðar verða breytingar á búvörusamningum. Fæðingarorlof verður hækkað í skrefum og fyrirtæki sem hafa 25 eða fleiri starfsmenn þurfa að taka upp jafnlaunavottun.

Kalla eftir sérstöku dómsmálaráðuneyti

Fram kemur í Morgunblaðinu í dag að Sjálfstæðisflokkurinn fær fimm af átta formönnum þingnefnda það komi til greina að Sjálfstæðisflokkurinn fái sex ráðuneyti í stað fimm. Hefur Morgunblaðið heimildir fyrir því að flokkurinn hafi kallað eftir því í viðræðunum að innanríkisráðuneytinu verið skipt og stofnað verði sérstakt dómsmálaráðuneyti. Einnig verða kannaðir möguleikar á breytingum á fiskveiðistjórnunarkerfinu, en í stað ótímabundins afnotaréttar verður athugað hvort hægt verður að taka upp leigu á aflaheimildum til 33 ára. Er það hugsað til þess að fá auknar tekjur af veiðigjöldum. Þingmenn Sjálfstæðisflokksins segja að það verði ekki hróflað við aflamarkskerfinu.

Líkt og áður segir verður ráðherraskipan ríkisstjórnarinnar ákveðin í kvöld, stefnt er að því að skipta um ríkisstjórn á morgun og ný ríkisstjórn taki þá við á ríkisráðsfundi á Bessastöðum.

Ari Brynjólfsson – ari@pressan.is