„Nái þessi stjórnarmyndun fram að ganga má öllum ljóst vera að Katrín Jakobsdóttir formaður VG lét framhjá sér fara tækifæri til að axla ábyrgð.  Í stað þess að sýna forystu og stjórnun fylgdi hún straum stjórnleysis innan eigin flokks. Straumnum sem bergmálar gagnrýni án lausna.  Hávaða án innihalds, orða án merkinga.  Hún staðfesti í raun að hún ætlar sér ekki að verða sá villikattasmali sem þörf væri á ef flokkur hennar ætlar að hafa alvöru áhrif.“

Þetta segir Elliði Vignisson bæjarstjóri Vestmannaeyja á vefsíðu sinni í dag en nú hillir undir ríkisstjórn Sjálfstæðisflokks, Viðreisnar og Bjartrar framtíðar undir forystu Bjarna Benediktssonar. Elliði segir að sé lítist nokkuð vel á þá stjórn og það sé tilraunarinnar virði þó það sé óvíst að hún haldi út kjörtímabilið með svo tæpan meirihluta.

„Vinstri græn ætla að marka sér sérstöðu sem flokkur sem vill standa á hliðarlínunni“

Elliði segir að ef sú stjórn tæki við þá sópist af borðinu tækifæri íslensku þjóðarinnar til að leiða í jörðu deilumál undanfarinna áratuga. Með stjórn tveggja stærstu flokkanna á Alþingi, Sjálfstæðisflokks og Vinstri grænna, sem standa á sitthvorum pólnum og hafa því breiða skírskotun, þá sé tækifæri til að sætta sjónarmið um náttúruvernd, nýtingu auðlinda, afstöðu til Evrópusambandsins, framtíðar fyrirkomulag í landbúnaði, uppbyggingu heilbrigðiskerfis og svo margt annað:

Um leið hefði Karín í samstarfi við Bjarna getað endurmótað löngu úrelt og heftandi samstarfsmunstur í íslenskum stjórnvöldum þar sem kaldastríðsviðhorf hafa reist girðingar mili flokka og þar með tryggt miðjuflokkum áhrif langt umfram lýðræðislegt umboð.

Hann segist ekki efast um að Katrín sé meðvituð um stöðuna:

„Það er ekkert óeðlilegt að hún reyni í örvæntingu að berja í brestina þótt vissulega komi á óvart að hún skuli leita liðsinnis Framsóknarflokksins í þeim tilraunum. Eftir stendur að Vinstri græn ætla að marka sér sérstöðu sem flokkur sem vill standa á hliðarlínunni og gagnrýna fremur en að axla ábyrgð og veita forystu.  Vel má vera að vinstrimönnum á Íslandi líki vel að styðja þannig flokk.  Annar möguleiki er að þeir telji atkvæðum betur varið hjá flokkum sem eru til í að axla ábyrgð.“