Í Afríku stendur nú yfir barátta náttúruaflanna og mannanna. Skógar eru felldir og fólkinu fjölgar en samt sem áður hefur magn gróðurs í álfunni aukist undanfarin 20 ár og það verða að teljast góð tíðindi.

Þetta eru niðurstöður nýrrar rannsóknar. Á sama tíma og menn fella skóga og tré á þéttbýlum svæðum þá spretta runnar og annar álíka gróður fram á strjálbýlum svæðum. Á vef videnskab.dk kemur fram að nú hafi danskir vísindamenn mælt gróðurþróun í álfunni undanfarin 20 ár. Niðurstöðurnar eru að 36 prósent álfunnar eru orðin grænni en á 11 prósentum hennar hefur gróður minnkað. Það er því ekki allt slæmt sem er að gerast í náttúrunni í álfunni.

Martin Brandt, hjá Kaupmannahafnarháskóla, vann að rannsókninni. Hann segir það sé auðvitað ekki gott að sjá neikvæð áhrif af völdum manna á gróðurinn í 11 prósentum álfunnar undanfarin 20 ár en það komi þó ekki á óvart. Hann bendir einnig á að ekki sé allt slæmt því á miklu stærra svæði hafi gróðurmagnið aukist á sama tíma.

Vísindamennirnir notuðu gervihnattamyndir til að rannsaka áhrif loftslagsbreytinga og af völdum manna á útbreiðslu trjáa og runna í Afríku. Mennirnir fella tré til að fá jarðrými fyrir akra og byggðir. Samfara loftslagsbreytingunum eykst magn CO2 í andrúmsloftinu en í blöndu við aukna rigningu er það gott fyrir tré og runna.