„Mér hefur verið tjáð að ástæðan fyrir því að ég fæ ekki lengur fréttabréf Framsóknarflokksins sé sú að mér hafi verið sparkað úr flokknum. Er það í annað skiptið sem það gerist, og gerðist það í fyrra skiptið eftir flokksþingið þegar ég skoraði á Sigmund Davíð að fara í sérframboð. Nú þegar ég hef ítrekað áskorunina er mér, samkvæmt efninu, sparkað úr flokknum aftur.“

Þetta segir Gunnar Kristinn Þórðarson stjórnsýslufræðingur á Fésbókarsíðu sinni. Gunnar Kristinn talað fyrir því að Sigmundur Davíð Gunnlaugsson þingmaður og fyrrverandi formaður Framsóknarflokksins yfirgefi flokkinn og stofni nýjan flokk. Segir Gunnar Kristinn að hann sé alls ekki einn á þeirri skoðun, fjölmörgum Framsóknarmönnum sé misboðið hvernig ástandið sé í flokknum.

Sjá frétt: Framsóknarmenn vilja að Sigmundur Davíð stofni nýjan flokk

Þessi hugmynd hefur verið rædd meðal flokksmanna og hefur Gunnar Bragi Sveinsson oddviti flokksins í Norðvesturkjördæmi verið spurður hvort hann tengist slíkum hugmyndum. Sagði Gunnar Bragi að tengdist ekki slíkum hugmyndum, en þær kæmu ekki á óvart.

Sjá frétt: Framsóknarflokkurinn á vondum stað – Hugmyndir um nýjan flokk koma ekki á óvart

Gunnar Kristinn segir að honum hafi aftur verið vikið úr flokknum eftir að hann ítrekaði áskorun sína nýverið:

Nú þegar ég hef ítrekað áskorunina er mér, samkvæmt efninu, sparkað úr flokknum aftur. Liggur þá ljóst fyrir að flokkselítan í Ólafsstofu (skrifstofu Framsóknarflokksins að Hverfisgötu) fer jafn frjálslega með flokksskrána og kjörskrána á flokksþingum.
Það hefur þó legið fyrir að ég ætla að vera áfram í flokknum ef Sigmundur stofnar ekki nýjan flokk til að bjarga þeim gildum sem hann var stofnaður til fyrir hundrað árum. Að henda fólki út af flokksskrá gengur gegn reglum félagsins, en það truflar ekki skósveina fjárplógsmanna. Reikna með að þetta fari sína leið innan flokksins.