Dame Judi Dench hefur hlotið bresku leiklistarverðlaunin oftar en nokkur önnur manneskja
Breska stórleikkonan Dame Judi Dench bætti enn einni fjöðrinni í hattinn á sunnudag, þegar hún hlaut Oliver-verðlaunin, bresku leiklistarverðlaunin, í áttunda sinn á ferlinum. Þar með hefur þessi 81 árs leikkona hlotið verðlaunin oftar en nokkur annar einstaklingur. Hún hlaut verðlaunin í ár sem besta leikkona í aukahlutverki fyrir túlkun sína á Paulinu í Vetrarsögu eftir William Shakespeare, sem sett er upp í Garrick-leikhúsinu í London. Í verkinu leikur Dench á móti leikstjóranum og leikaranum Kenneth Branagh.
Dench steig fyrst á atvinnumannasvið árið 1957 og á þeim sex áratugum sem hafa liðið frá frumrauninni hefur hún öðlast heimsfrægð, meðal annars fyrir túlkun sína á M, yfirmanni njósnarans James Bond, og verið öðluð af bresku drottningunni.
Þrátt fyrir það komu verðlaunin henni á óvart. „Ég er sannarlega upp með mér … ég bjóst ekki við þessu. Ég stofnaði til veðmáls við barnabarn mitt um þetta, og nú verð ég að borga … ég skulda honum hádegismat.“
Meðal sviðsverka sem voru verðlaunuð á hátíðinni voru Ma Rainey‘s Black Bottom, Showstopper! The Improvised Musical, óperan Cavalleria Rusticana/Pagliacci, grínleikritið Nell Gwynn, dansverkið Woolf Works, söngleikirnir Gypsy og Kinky Boots.