„Titillinn á predikun minni í kvöld er þessi: Ísland, land bastarða.“ Þetta sagði bandaríski presturinn Steven Anderson í byrjun predikunar sinnar í Faithful Word-baptistakirkjunni í borginni Tempe í Arizona á sunnudag. Þar fjallaði Steven meðal annars um börn sem fæðast utan hjónabands. Að mati Stevens er Ísland ekki beint fyrirmyndarríki hvað þetta varðar.

Í predikun sinni sagðist Steven ætla að fjalla um hugtakið bastarður eins og það er skilgreint samkvæmt orðabók, það taki til barna sem fæðast utan hjónabands. Vísaði hann í upplýsingar, sem hann sagði vera frá CNN, þess efnis að 40 prósent barna á Íslandi fæðist utan hjónabands og að hér á landi væri hæst hlutfall ógiftra mæðra. Sagði Steven að Bandaríkjamenn stæðu Íslendingum ekki langt að baki en Ísland ætti heimsmet í fjölda einstæðra mæðra.

„Meira en tveir þriðju hlutar íslenskra barna eru fæddir foreldrum sem eru ekki giftir. Það er þess vegna sem ég kalla Ísland land bastarðanna,“ segir hann og bætir við að víða myndi fólk skammast sín fyrir þetta. „En í landi víkinganna er þetta eitthvað til að vera stoltur af,“ segir hann.

Predikunin er tæpur klukkutími að lengd og kom Steven víða við í henni. Sagði hann að það færi illa með börn að alast upp „á brotnum“ heimilum og þau glími við ýmis konar vanda á fullorðinsárum sínum. Þá sagði Steven að Íslendingar ættu að skammast sín.

Faithful Word-baptistakirkjan var stofnuð í Arizona árið 2005 og hefur Steven þessi verið harðlega gagnrýndur fyrir hatursorðræðu, til dæmis í garð samkynhneigðra. Árið 2009 sagðist Steven í predikun sinni óska Barack Obama, forseta Bandaríkjanna, dauða.

Þá komst Anderson í kast við lögin árið 2009 þegar hann neitaði að svara spurningum landamæravarða skammt frá borginni Yuma í Arizona sem er við landamæri Mexíkó. Anderson gaf sig hvergi og endaði það með því að laganna verðir brutu rúðu í bifreið hans og beittu rafmagnsbyssu gegn honum.

Erindi prestsins má sjá hér að neðan: