Þýska landsliðið ætlar að greiða fyrir rútuferðir 600 stuðningsmanna á lokaleik liðsins í riðlakeppni HM eftir mikla gagnrýni á hátt verð á samgöngum á mótinu.

Þýskaland mætir Ekvador í New Jersey þann 25. júní en verð á lestarmiðum frá miðborg New York hækkaði úr tæpum 13 dollurum upp í allt að 150 dollara fyrir HM.

Rútufargjöld hafa einnig verið gagnrýnd, þó þau hafi síðar verið lækkuð úr 80 dollurum niður í 20.

Þýska knattspyrnusambandið staðfesti að leikmenn liðsins, undir forystu Joshua Kimmich fyrirliða, muni standa straum af kostnaði við rútuferðirnar.

Á HM í Rússlandi og Katar var stuðningsmönnum boðið upp á fríar samgöngur en það er annað uppi á teningnum í Bandaríkjunum.