Áhyggjur hafa aukist meðal vestrænna sérfræðinga um að Rússland kunni að beina sjónum sínum á næstunni að austurjaðri NATO, jafnvel þótt átökum í Úkraínu kunni að linna á næstu misserum.

Einkum hefur verið bent á bæinn Narva í Eistlandi, sem liggur beint að landamærum Rússlands.

Daily Mail ræddi á dögunum við Tim Willasey-Wilsey, fyrrverandi diplómat og prófessor við King’s College í London, sem segir að jafnvel þótt vopnahlé náist í Úkraínu sé ekki víst að spennan komi til með að minnka. Telur hann að Rússar gætu látið reyna á samstöðu NATO með litlum aðgerðum fremur en opnum hernaði. Narva sé í því samhengi sérstaklega viðkvæmur staður.

Narva er lítill bær í austurhluta Eistlands og er aðeins aðskilinn frá Rússlandi með á. Mikill meirihluti íbúa bæjarins talar rússnesku og er af rússnesku bergi brotinn og margir eiga fjölskyldu hinum megin landamæranna.

Bærinn varð hluti af sjálfstæðu Eistlandi eftir fall Sovétríkjanna, en tengsl hans við Rússland hafa haldist sterk.

Sérfræðingar benda á að lýðfræðileg staða Narva geri hann að hugsanlegu skotmarki fyrir Rússland. Gætu stjórnvöld í Moskvu reynt að réttlæta aðgerðir með vísan til verndar rússneskumælandi íbúa. Slíkt hefur áður verið notað sem rök, til dæmis þegar Rússar innlimuðu Krímskaga.

Fátt bendir til þess að stríðið í Úkraínu sé á lokametrunum og segja Úkraínumenn að Rússar séu raunar orðnir stórtækari í árásum sínum á óbreytta borgara.