Örn Geirsson gefur kost á sér í 4. sæti í prófkjöri Sjálfstæðisflokksins í Hafnarfirði sem fram fer laugardaginn 7. febrúar 2026.

Í tilkynningu frá Erni kemur fram að hann er fæddur og uppalinn í Hafnarfirði og þekkir vel staðhætti bæjarins. Á líðandi kjörtímabili hefur hann verið varamaður og síðar aðalmaður í umhverfis- og framkvæmdaráði, auk þess að sinna öðrum trúnaðarstörfum fyrir flokkinn.

„Með framboði mínu vil ég leggja mitt af mörkum til áframhaldandi sterkrar og ábyrgðarfullrar forystu flokksins í bæjarstjórn Hafnarfjarðar. Ég tel að reynsla mín af mannlegum samskiptum og verkefnastjórnun, ásamt þekkingu á rekstri og viðhaldi eigna, nýtist vel í þeim verkefnum sem fram undan eru.

Í dag starfa ég sem umsjónarmaður fasteigna hjá Hafnarfjarðarbæ og ber þar ábyrgð á húsnæði Engidalsskóla og leikskólans Álfabergs. Ég legg ríka áherslu á gott viðhald eigna bæjarins og vandað umhverfi, enda skipta slík atriði miklu máli fyrir lífsgæði íbúa.

Ég brenn fyrir því að efla innviði bæjarins, fegra umhverfið og styðja áfram við öflugt menningar- og mannlíf í Hafnarfirði, auk þess að bæta aðstöðu íþrótta- og tómstundastarfs fyrir alla aldurshópa.“

Örn, sem er meistari í prentsmíði, er giftur Steinunni Hreinsdóttur og eiga þau saman sjö börn.