Heimir Hallgrímsson gefur sterklega í skyn að hann sé tilbúinn að ræða nýjan samning við írska knattspyrnusambandið (FAI) eftir glæsilega sigra á Portúgal og Ungverjalandi.
Þjálfarinn er orðinn eftirsóttur eftir árangurinn en vildi þó ekki staðfesta hvort formlegar viðræður væru að hefjast.
„Við sögðum að þegar rykið myndi setjast, þá myndum við setjast niður og ræða saman,“ sagði Heimir.
„Það hefur alltaf verið heiðarlegt samtal. Þetta mun gerast fyrr en síðar, en ekki í fjölmiðlum. Bara ég og þeir.“
Írland mætir Tékklandi á útivelli 26. mars í undanúrslitum umspilsins fyrir HM 2026. Vinnist sigur þar, taka Írar á móti annað hvort Danmörku eða Norður-Makedóníu á Aviva-leikvanginum fimm dögum síðar.
