Ekki hafa fengist frekari upplýsingar hjá talsmönnum Norðuráls um stöðu mála vegna bilunar í álveri félagsins á Grundartanga. Samkvæmt upplýsingum frá Vilhjálmi Birgissyni, formanni Verkalýðsfélags Akraness, keyrir álverið nú á um þriðjungsafköstum. Slökkt hefur verið á 340 kerum af 520 og eru því aðeins 180 ker í rekstri.
Norðurál sendi frá sér eftirfarandi tilkynningu um málið í gærkvöld:
Framleiðsla hefur verið stöðvuð í annarri af tveimur kerlínum álvers Norðuráls á Grundartanga í kjölfar bilunar í rafbúnaði í álverinu. Þetta veldur því að álframleiðsla á Grundartanga skerðist um tvo þriðju um óákveðinn tíma. Framleiðsla í hinni kerlínu Norðuráls er stöðug og hefur umrædd bilun engin áhrif á rekstur hennar.
Unnið er að því að greina ástæður bilunarinnar, og útvega og flytja til landsins búnað til að koma framleiðslu í fyrra horf. Jafnframt mun Norðurál vinna náið með birgjum sínum og viðskiptavinum vegna breyttra áætlana.
Samkvæmt heimildum DV skemmdust afriðlar og spennar sem voru komnir á tíma. Talið er að það geti tekið 9-12 mánuði að fá nýja íhluti. Langan afhendingartíma má rekja til stríðsins í Úkraínu þar sem Rússar hafa skemmt gífurlegt magn spennubúnaðar og valdið þar með miklum skorti á þessumn nauðsynlega búnaði.
Norðurál hefur ekki gefið upplýsingar um hvort von sé á uppsögnum hjá fyrirtækinu vegna þessarar rekstrarstöðvunar að hluta. Í augnablikinu eru miklu fleiri starfsmenn en þarf fyrir rekstur þeirra 180 kera sem eru virk. Fjöldi stöðugilda hjá Norðurárli árið 2024 var 675 en DV hefur ekki upplýsingar hvernig starfsmannafjöldi skiptist milli deilda.
Þessi vondu tíðindi bætast við fréttir um að Elkem hyggist draga úr framleiðslu í járnblendiverksmiðju sinni á Grundartanga. Vilhjálmur Birgisson bendir á að stóriðjan á Grundartanga skapi um 151 milljarð króna í útflutningstekjur á ári, sem eru tæplega 8% af öllum útflutningstekjum þjóðarinnar. Á hann þar við samanlagða veltu álversins og járnblendiverksmiðjunnar. Gífurlega mikið er því í húfi varðandi það að starfsemi álvers Norðuráls komist sem fyrst í eðlilegt horf.
Sólveig Kr. Bergmann, framkvæmdastjóri samskipta og samfélagsmála hjá Norðuráli, segir í viðtali við mbl.is að framleiðslustöðvun í tveimur þriðju hluta kera fyrirtækisins muni að öllum líkindum vara í mánuði en ekki vikur.
Ekkert hafi hins vegar verið ákveðið varðandi uppsagnir á starfsfólki. Sólveig segir fjárhagslegt tjón ekki liggja fyrir en allt hafi verið lagt á verðmætabjörgun í gærkvöld og nótt. „Það er allur fókus á að ná tökum á framleiðslunni og stöðunni,“ segir Sólveig og vísar þar til þess að enn er framleiðsla í um þriðjungi kera álversins.
