Stærsti vinningur í 38 ára sögu Happaþrennunnar – 10 milljónir króna – gekk nýverið út. Vinningurinn kom á Happagullsmiða sem kostar 1.000 krónur og því má segja að vinningshafinn hafi 10 þúsund faldað peninginn sinn.

Þetta kemur fram í tilkynningu frá Happdrætti Háskóla Íslands.

„Það er alltaf ánægjulegt þegar stór vinningur gengur út en sérstaklega ánægjulegt þegar um sögulegan vinning er að ræða,“ segir Hjördís María Ólafsdóttir, markaðsstjóri og rekstrarstjóri happdrætta hjá Happdrætti Háskóla Íslands, í tilkynningunni.

„Happaþrennan hefur átt fastan sess í hjörtum Íslendinga allt frá því hún kom fyrst á markað árið 1987. Happagullið er nýjasti miðinn sem er í boði og nú hefur í fyrsta skipti 10 milljón króna vinningur gengið út – en sannarlega ekki í það síðasta,“ segir hún.

Vinningsmiðinn var keyptur í sjálfsala sem staðsettur er í Hagkaup í Skeifunni. Vinningshafinn leysti vinninginn út í smáforritinu Happinu og því liðu ekki nema nokkrar mínútur frá því vinningshafinn kláraði að skafa miðann þar til 10 skattfrjálsar milljónir voru komnar inn á bankareikninginn hans.

„Happdrætti Háskóla Íslands óskar hinum nýja milljónamæringi innilega til hamingju með að vera kominn í hóp fjölmargra Íslendinga sem hafa hlotið vinning í Happaþrennunni í gegnum tíðina,” segir í tilkynningunni og því bætt við að lokum að ný sending af Happagulli komi í verslanir á næstu dögum. Þar verði að finna einn tíu milljóna króna vinningsmiða.