Snorri birtir færslu á Facebook-síðu sinni þar sem hann tjáir sig um síðustu daga.
„Eftir umtalað sjónvarpsviðtal á mánudaginn eru að baki líklega undarlegustu nokkrir dagar á mínum stutta stjórnmálaferli. Vanstillt viðbrögð á netinu hafa sannarlega tekið út yfir allan þjófabálk,” segir hann og heldur áfram:
„Efnislega vekur helst athygli mína þar að jafnan er lagt út af einhverju sem ég hef aldrei sagt. Mér eru gerð upp viðhorf og ummæli. Sú staðreynd hefur þó ekki dregið úr stóryrðunum, sem sumum er beint að persónu minni og jafnvel fjölskyldu.”
Snorri segir að þetta sé þó aðeins það sem maður sér á yfirborði samfélagsmiðlanna.
„Á sama tíma fæ ég ekki svarað öllum þeim straumi skilaboða sem mér berast með þökkum fyrir að ræða þessi mál opinskátt og af virðingu,” segir hann og bætir við að þessum skilaboðum fylgi oftar en ekki lína um að sendandinn þori sjálfur ekki að lýsa sinni skoðun opinberlega, né lýsa yfir stuðningi við hans sjónarmið.
„Þessi viðbrögð, bæði heilaga vandlætingin en einnig þakklætisbylgjan, gera því ekki annað en staðfesta áhyggjur mínar í viðtalinu af afar viðsjárverðri þöggun sem hefur grafið um sig í okkar samfélagi,“ segir hann.
Hann segist þó taka einn hluta gagnrýninnar til sín og hún snýr að framíköllum hans í umræddum Kastljósþætti á mánudagskvöld.
„Mér hefur áður verið bent á að láta kappið ekki bera fegurðina ofurliði. Þetta er bagalegur ósiður í sjónvarpssal, einn af þeim sem ég lofa hér með formlega að losa mig alfarið við fyrir þrítugt. Ég er annars mættur til starfa. Leit í morgun við á vinnustofu um gervigreind og netöryggi. Þingið er sett í næstu viku. Við erum rétt að byrja!“
