Samtökin hafa sent frá sér yfirlýsingu vegna fréttaflutnings um hótanir í garð þingmannsins Snorra Mássonar og fjölskyldu hans.
Greint var frá því í morgun að lögregla hefði vaktað heimili Snorra í nótt eftir að honum bárust hótanir á samfélagsmiðlum. Þá voru birtar upplýsingar um heimilisfang hans.
„Slíkt athæfi á sér engan rétt í lýðræðissamfélagi og gengur þvert gegn gildum mannréttinda, jafnréttis og friðsamlegrar umræðu sem við stöndum fyrir,“ segir í tilkynningunni.
„Við vitum að umræða um trans fólk og réttindi hinsegin samfélagsins getur verið átakamikil. Það réttlætir aldrei að fólk sé sett í hættu eða beitt ofbeldi. Við höfum trú á því að breytingar náist með samstöðu, fræðslu og friðsamlegri baráttu fyrir réttlæti,“ segir enn fremur.
Samtökin hvetja öll þau sem vilja standa með hinsegin fólki til að taka þátt í þeirri baráttu með friðsömum hætti, án haturs og án ofbeldis.
„Það er með kærleika, samstöðu og seiglu sem við vinnum okkar stærstu sigra. Þeim sem eiga um sárt að binda er bent á ráðgjafarþjónustu Samtakanna. Einnig minnum við á næstu gagnræðunámskeið sem fram fara þriðjudaginn 16. september og mánudaginn 6. október.“
