Inga Sæland félags- og húsnæðismálaráðherra dvelur nú á eftirlætis dvalarstað Íslendinga Tenerife. Fyrr í dag sendi hún beint út frá eyjunni í suðri á Facebook-síðu sinni. Ítrekaði Inga að þótt hún væri þarna stödd tæki hún sér ekki frí frá vinnunni og nýtti tækifærið til að leiðrétta ýmsar fullyrðingar sem hún segist hafa orðið vör við þegar kemur að komandi kjarabótum fyrir öryrkja sem hún segir að verði ríflegar og muni verða að veruleika í næsta mánuði.
Inga segir ráðherra ríkisstjórnarinnar raunar alltaf vera í vinnunni sama hvar þeir séu. Hún beinir því næst orðum sínum að þeim sem halda því fram að ekkert sé að marka orð í stjórnarsáttmálanum um kjarabætur til handa öldruðum og öryrkjum:
„Það er náttúrulega bara bull og vitleysa. Ég er ekki ein löggjafinn. Ég er ekki sú sem er ein með fjárveitingarvaldið. Það er Alþingi Íslendinga eins og það leggur sig. Þannig að öll þau mál sem ég kem með inn á Alþingi Íslendinga fara í atkvæðagreiðslu. Þannig að við skulum vona það að stjórnarandstaðan sé búin að taka lyf við þessum tafaleikjum sínum þannig að hún komi vaskari inn í haust. Þannig að málin okkar nái rauverulega fram að ganga.“
Inga ítrekaði hins vegar að þrátt fyrir að mörg mál ríkisstjórnarinnar hafi ekki komist í gegn á síðasta þingi vegna þeirra tafa sem urðu á þingstörfum, vegna deilna um hækkun veiðigjalds, sé það frágengið að laun öryrkja muni batna í næsta mánuði:
„Ég get alveg sagt ykkur það að 1. september þá munu laun öryrkja hækka.“
Hún segir fullyrðingar að um smávægilegar upphæðir sé að ræða einfaldlega rangar:
„Þeir sem eru með lægstu launin í almannatryggingarkerfinu þeir fá tugi þúsunda í hækkun þann 1. september. Það liggur algerlega fyrir.“
Inga segir enn fremur að unnið sé að viðbrögðum við áhyggjum af því að húsnæðisstuðningur til öryrkja lækki samhliða áðurnefndri hækkun:
„Það mun ekki verða látið gerast á minni vakt.“
Inga biður að lokum um traust til ríkisstjórnarinnar til að vinna þau verk sem vænst hafi verið af henni enda sé hún traustsins verð.
