Embætti landlæknis og sóttvarnalæknir vara við fegrunarmeðferðum með ólöglegu bótúlíneitri og vara við því að fólk gangist undir slíkar meðferðir hjá aðilum sem ekki hafa fengið starfsleyfi frá embætti landlæknis. Þetta kemur fram í tilkynningu frá embættinu en tilefni hennar eru tilkynningar um alvarlegar bótúlíneitranir eftir aðgerðir á snyrtistofum í Bretlandi síðustu þrjá mánuði.

Bótúlíneitur, gjarnan kallað bótox, er mikið notað í fegrunarmeðferðum en einnig við margvíslegum öðrum heilsuvandamálum. Nýlega var tilkynning um alvarlegar eitranir af bótúlínum- lyfjavöru send í gegnum EWRS-tilkynningarkerfi Evrópusambandsins sem miðlar upplýsingum um heilsufarsógnir milli aðildarríkja og samstarfsaðila.

Tæplega 40 tilvik eitrana hafa verið staðfest í Bretlandi en þá var um að ræða fegrunarmeðferð þar sem bótúlíneitri var sprautað. Helstu eitrunareinkenni voru óskýrt tal og erfiðleikar við kyngingu og/eða öndun. Voru 22 einstaklingar lagðir inn á sjúkrahús vegna eitrana, þar af enduðu sjö á gjörgæslu. Landlæknir tekur fram að þó að eitranir séu óalgengar þá geti þær verið lífshættulegar.

Landlæknir hefur upplýst Landspítala og aðra viðbragðsaðila í heilbrigðisþjónustunni um málið og eru þeir sem hafa farið í fegrunarmeðferðir undanfarnar vikur þar sem bótúlínum-lyfjavara var notuð af einstaklingi sem ekki hefur starfsleyfi geta haft samband við síma 1700 fyrir ráðgjöf.

Embættið biðlar til þeirra sem íhuga að fara í svona meðferð að ganga úr skugga um að meðferðaraðilinn sé með gilt starfsleyfi landlæknis en hægt er að athuga starfsleyfi í starfsleyfaskrá embættis landlæknis. Aðeins þeir sem koma fram í skránni eru með leyfi. Bótúlíneitur er virkt efni í viðurkenndum lyfjum sem eru löglega á markaði hér á landi og notuð sem slík í lögmætum hætti.

Landlæknir hefur ekki fengið tilkynningu um eitranir hér á landi en það getur tekið allt að fjórar vikur fyrir einkenni að koma fram. Í tilkynningu segir:

„Embætti landlæknis hefur enn sem komið er ekki fengið upplýsingar um bótúlíneitranir hér á landi, en það getur tekið allt að 4 vikur fyrir einkenni að koma fram. Hins vegar hefur embættið upplýsingar um að vörur sem innihalda bótúlíneitur séu fluttar ólöglega til Íslands og notaðar hér á landi. Eðli málsins samkvæmt getur embættið ekki sagt til um hvort um sé að ræða sömu vöru hérlendis og í Bretlandi. Embættið hefur upplýst lögreglu um mál sem varða notkun ólöglegra lyfja af þessum toga.“