Hvort sem fólk er þeirrar skoðunar að málþóf eigi sér nú stað á Alþingi eða ekki leikur mörgum forvitni á að vita hver ræðukóngurinn er á Alþingi á yfirstandandi þingi. Eyjunni er því ljúft og skylt að taka þær upplýsingar saman og miðla til lesenda. Keppnin er hörð í ár og munar litlu á efstu sætunum.

Þriðja sætið hneppir Vilhjálmur Árnason úr Sjálfstæðisflokknum. Vilhjálmur hefur meðal annars flutt 120 ræður og veitt 220 andsvör. Allt í allt hefur hann talað í 1178,27 mínútur eða í 19,6 klukkustundir.

Það kemur kannski ýmsum á óvart en Miðflokksmaðurinn Bergþór Ólason er ekki ræðukóngur heldur hneppir 2. sætið fyrir að tala í 1280,04 mínútur eða 21,3 klukkustundir. Þetta afrekaði Bergþór meðal annars í 187 ræðum og 248 andsvörum.

Ræðukóngur Alþingis er í raun drottning að þessu sinni, en Bryndís Haraldsdóttir þingmaður Sjálfstæðisflokks hefur talað í 1300,14 mínútur eða 21,7 klukkustundir. Þetta afrekaði hún meðal annars með 165 ræðum og 284 andsvörum.

Hér má sjá topp 10 listann yfir málglöðustu þingmennina á yfirstandandi þingi: 

1. Bryndís Haraldsdóttir, Sjálfstæðisflokkur – 21,7 klst
2. Bergþór Ólason, Miðflokkur – 21,3 klst
3. Vilhjálmur Árnason, Sjálfstæðisflokkur – 19,6 klst
4. Karl Gauti Hjaltason, Miðflokkurinn – 19 klst
5. Þorgrímur Sigmundsson, Miðflokkurinn – 18,5 klst
6. Njáll Trausti Friðbertsson, Sjálfstæðisflokkur – 18,1 klst
7. Jón Pétur Zimsen, Sjálfstæðisflokkur – 17,7 klst
8. Guðlaugur Þór Þórsson, Sjálfstæðisflokkur – 16,6 klst
9. Þórarinn Ingi Pétursson, Framsóknarflokkur – 15,3 klst
10. Sigríður Á. Andersen, Miðflokkurinn – 14,6 klst

Þessir þingmenn töluðu samanlagt í 182,4 klukkustundir. Af listanum mætti ráða að Sjálfstæðisflokkurinn hafi sigurinn í ræðukeppni flokkanna, en það er þó ekki svo. Þingmenn hinna stjórnarandstöðuflokkanna tala nefnilega meira að meðaltali eins og sýnt verður hér að neðan.

Þingmenn Miðflokksins 

• Bergþór Ólason – 21,3 klst
• Ingibjörg Davíðsdóttir – 13 klst
• Karl Gauti Hjaltason – 19 klst
• Nanna Margrét Gunnlaugsdóttir – 10,4 klst
• Sigmundur Davíð Gunnlaugsson – 11,3 klst
• Sigríður Á. Andersen – 14,6 klst
• Snorri Másson – 12,6 klst
• Þorgrímur Sigmundsson – 18,5 klst

Alls: 120,7 klst, eða um 15 klst á þingmann að meðaltali.

Þingmenn Sjálfstæðisflokks

• Áslaug Arna Sigurbjörnsdóttir – 4,2 klst
• Bryndís Haraldsdóttir – 21,7 klst
• Diljá Mist Einarsdóttir – 5,6 klst
• Guðlaugur Þór Þórsson – 16,6 klst
• Guðrún Hafsteinsdóttir – 7,3 klst
• Hildur Sverrisdóttir – 6,3 klst
• Jens Garðar Helgason – 11,8 klst
• Jón Gunnarsson – 12,2 klst
• Jón Pétur Zimsen – 17,7 klst
• Njáll Trausti Friðbertsson – 18,1 klst
• Ólafur Adolfsson – 12 klst
• Rósa Guðbjartsdóttir – 8,9 klst
• Vilhjálmur Árnason – 19,6 klst
• Þórdís Kolbrún Reykfjörð Gylfadóttir – 4,3 klst

Alls: 166,3 klst eða tæpar 12 klst á hvern þingmann að meðaltali.

Þingmenn Framsóknar

• Halla Hrund Logadóttir – 7,3 klst
• Ingibjörg Isaksen – 11,1 klst
• Sigurður Ingi Jóhannsson – 13,9 klst
• Stefán Vagn Stefánsson – 14,4 klst
• Þórarinn Ingi Pétursson – 15,3 klst

Alls: 62 klst eða um 12,2 klst á þingmann að meðaltali.

Sé fólk forvitið um stjórnarflokkana skal það fylgja sögunni hvað þeir hafa masað mikið á yfirstandandi þingi. Ræðukóngur stjórnarflokkanna er Sigurjón Þórðarson úr Flokki fólksins með 6,9 klst, en fast á hæla hans kemur flokkssystir hans, Kolbrún Áslaugar Baldursdóttir með 6,6 klst. Viðreisnarmaðurinn Sigmar Guðmundsson og Jóhann Páll Jóhannsson úr Samfylkingunni koma svo næstir með 5,1 klst.

Þingmenn Samfylkingarinnar hafa talað í um 44,3 klst, þingmenn Viðreisnar hafa talað í 34,9 klst og þingmenn Flokks fólksins í 25,8 klst.

*Ofangreint byggir á stöðunni eins og hún var klukkan 14:00 í dag.