Harry Bretaprins hefur hug á að rétta föður sínum, Karli Bretakonungi, og bróður, Vilhjálmi Bretaprins sáttahönd, eða „ólífugrein“ eins og breskir miðlar nefna það, með því að bjóða þeim á Invictus-leikana árið 2027, sem haldnir verða i Birmingham í Englandi.
Boð verður sent með tölvupósti til feðganna síðar í þessum mánuði, og formlegt boð verður síðan sent í kjölfarið, að því er Daily Mail greindi frá í gær.
„Harry hefur samþykkt að Invictus bjóði fjölskyldu sinni,“ sagði heimildarmaður. „Invictus vonast til að konungsfjölskyldan komi til að styðja særða hermenn sem taka þátt.“
Heimildarmaðurinn sagði að Harry væri vongóður um að faðir hans muni leggja ágreining þeirra til hliðar til að styðja íþróttakeppnina sem haldin er tvisvar á ári fyrir særða, veika eða slasaða hermenn og fyrrverandi hermenn.
„Konungsfjölskyldan hefur alltaf stutt Invictus gríðarlega og er stolt af því sem Harry hefur áorkað á því sviði. Þetta er sáttabeiðni frá honum sem gæti verið tekið vel í,“ sagði heimildarmaðurinn.
Tímasetning boðsins er sögð vera til að gefa meðlimum konungsfjölskyldunnar sem besta möguleika á að mæta, þar sem dagskrá Karls er þéttbókuð þrjú ár fram í tímann. Hins vegar er óljóst hvort konungurinn geti sótt viðburðinn þar sem Invictus-leikarnir 2027 eiga að hefjast 10. júlí það ár og ljúka á 80 ára afmæli Camillu drottningar, 17. júlí.
Leikarnir verða ekki haldnir árið 2026.
Page Six fékk staðfestingu á að engum hafi verið boðið enn, hvort sem það eru vinir, fjölskylda, stjórnvöld, hermenn, styrktaraðilar eða aðrir VIP-aðilar, þar sem lengra en tvö ár eru í viðburðinn. Það er teymi Invictus-leikanna í Birmingham 2027 sem ákveður boðslistann en ekki Harry.
Þessi tilraun Harrys til að sættast við eldri bróður sinn og föður þeirra vakti misvísandi viðbrögð frá konungssérfræðingum.
„Konungurinn gæti mætt til að sýna stuðning við herinn og óska Harry til hamingju með mikilvægasta árangur lífs síns,“ sagði Ingrid Seward, ævisagnaritari konungsfjölskyldunnar, við Daily Mail.
„Eina ástæðan fyrir því að konungurinn er tregur til að umgangast son sinn er sú að hann treystir honum ekki lengur til að endurtaka ekki einkasamræður þeirra eins og hann hefur gert áður,“ sagði hún og bætti við: „Þetta á við um alla starfandi meðlimi fjölskyldunnar.“
„Konungurinn vill algerlega eiga samband við yngsta son sinn og barnabörn sín,“ sagði Katie Nicholl, fréttaskýrandi konungsfjölskyldunnar. „Hann hefur ótrúlega hæfileika til að fyrirgefa og hann vill vera örlátur í þessu máli og því er vissulega möguleiki á að konungurinn gæti íhugað að sækja Invictus.“
Í viðtali við BBC News í maí sagðist Harry örvæntingarfullur vilja grafa stríðsöxina með föður sínum.
„Charles vill ekki tala við mig vegna þessa öryggismáls,“ sagði Harry og vísaði til misheppnaðrar viðleitni sinnar um að öryggi hans, eiginkonu og braan þeirra tveggja væri greitt af breskum skattgreiðendum meðan þau heimsækja Bretland. „En það væri gott að sættast,“ bætti Harry við.
Samband Harry við konungsfjölskylduna hefur verið afar stirt síðan hann og eiginkona hans sögðu sig frá öllum konunglegu skyldum sínum og fluttu til Kaliforníu árið 2020. Síðan þá hafa hjónin tjáð sig í nokkrum viðtölum um konungsfjölskylduna þar sem þau hafa gagnrýnt hana harðlega. Harry greindi einnig frá ýmsu persónulegum málum fjölskyldunnar í bók sinni Spare árið 2023.
