Langt er síðan hrært hefur verið í nafnapotti fyrirtækja með jafn miklum tilþrifum og gert var í vikunni hjá Sýn, Stöð 2, Bylgjunni, Vísi, Vodafone, Fm 957, Gulli, Léttbylgjunni og nokkrum öðrum vörumerkjum Sýnar hf. sem er skráð fyrirtæki á Kauphöll Íslands.
Frægasta nafnabreytingin í íslensku viðskiptalífi er trúlega frá áttunda áratug síðustu aldar þegar flugfélögin á Íslandi voru sameinuð, gegn vilja fjölmargra hluthafa, yfirmanna og starfsmanna þeirra. Þá voru lögð til hliðar virt og viðurkennd nöfn þeirra félaga sem voru sameinuð með allnokkru valdi en það voru Loftleiðir og Flugfélag Íslands. Eftir það tók við nokkurra áratuga óformlegt stríð starfsmanna og eigenda hinna sameinuðu félaga sem seint virtust ætla að sætta sig við það að vera orðnir hluti af Flugleiðum hf.
Orðið á götunni er að nafnahræringur Sýnar hf. verði ekki svona dramatískur vegna þess að ekki er verið að sameina ólík félög. Það er löngu búið. En við sameiningar þeirra árið 2017 gleymdist að ljúka við að stokka upp nafnalistann að baki hinu sameinaða fyrirtæki og hefur það verið í miklum graut æ síðan.
Í sjálfu sér var ekki flókið að taka til í þessu nafnarugli og hefði mátt gera það með einfaldri ákvörðun stjórnar og helstu stjórnenda. Þess í stað var valið að gera breytinguna með flóknum og afar kostnaðarsömum hætti. Hermt er að 70 manns hafi komið að „stefnumótun“ um málið og sóttir hafi verið rándýrir danskir ráðgjafar yfir hafið. Niðurstaðan er sú að allt heitir nú Sýn, rétt eins og stjórnin hefði getað ákveðið í lok einhvers stjórnarfundarins.
En stundum er haft á orði að óþarfi sé að hafa hlutina einfalda ef unnt er að gera þá flókna. Sú leið var valin að þessu sinni.
Hin sjálfsagða niðurstaða er sú að þjóðin fær Sýn og vonandi skýrari sýn á allt það sem fyrirtækið hefur upp á bjóða til áhorfenda, neytenda og auglýsenda sem eru einmitt sá hópur sem hefur gengið verr að ná til vegna þess hve nafnasafn fyrirtækisins hefur verið víðfeðmt og ruglingslegt. Nú er þess vænst að öllum reynist auðveldara að fóta sig í víðtækri flóru fyrirtækisins – enda allt undir sama nafni Sýnar.
Orðið á götunni er að einn helsti mælikvarði á árangur af öllu þessu brölti sé hve vel hinu skráða félagi vegnaði á Kauphöll Íslands í gær þegar skotið var af með lúðraþyt og glæsibrag. Gengi hlutabréfa fyrirtækisins hækkaði ekki neitt. Var í lok dags 25, rétt eins og í upphafi dags. Einungis voru viðskipti með hlutabréf að markaðsverði átta milljónir íslenskra króna sem er nánast ekki neitt. Gengi hlutabréfa fyrirtækisins var í byrjun þessa árs 32 og hefur því lækkað um 22 prósent það sem af er þessu ári. Hæst fór gengi hlutabréfa Sýnar hf. sumarið 2022 í 70. Fallið er því mikið.
Það er því verk að vinna að ná upp skráðu verðmæti félagsins og löng leið fyrir höndum. Nú er spurningin hvort það að hræra hressilega í nafnapottinum muni duga til.
