Þetta er mikið högg fyrir rússneska herinn og er tjónið talið nema tugum, ef ekki hundruð, milljörðum króna.
En Pútín er ekki sagður ætla að láta þetta stoppa sig og er búist við því að rússneski herinn muni hefna fyrir árásina með grimmilegum hætti.
Þá er talað um að æðstu ráðamenn innan FSB, stærstu öryggisstofnun Rússlands, séu taugaóstyrkir vegna málsins og þeir þurfi að svara fyrir það hvernig Úkraínumönnum tókst að smygla nokkur hundruð drónum yfir til Rússlands sem notaðir voru við aðgerðina.
Carsten Breuer, yfirmaður þýska heraflans, óttast að Rússar séu að búa sig undir árás á aðildarríki NATO. Í viðtali við BBC bendir hann á að Rússar hafi sankað að sér skriðdrekum og skotfærum á undanförnum misserum. Þetta gefi til kynna að Rússar séu að búa sig undir víðtækari aðgerðir en hafa átt sér stað í Úkraínu á síðustu árum.
Carsten segir að hugsanlega muni Rússar ráðast að Eystrasaltsríkjunum á næstu fjórum árum. Aðildarríki NATO þurfi að búa sig undir þessa sviðsmynd og ógnin nú sé sú mesta sem hann hefur séð í áratugi. Bendir hann á að Rússar framleiði um 1.500 skriðdreka á ári.
„Þessir skriðdrekar fara ekki allir til Úkraínu og Rússar virðast vera að safna birgðum,“ segir hann og bætir við að Rússar séu einnig að framleiða skotfæri til að eiga á lager. Segir Carsten að greinendur reikni með að Rússar verði tilbúnir fyrir innrás ekki seinna en árið 2029.
