Fjölmiðlakonan Snærós Sindradóttir hyggst nú miðla af reynslu sinni og kynnir til leiks námskeið sem hún ætlar að halda í haust um rannsóknar- og sögu hlaðvörp.
Þrjú námskeið verða í boði á bilinu september til desember og býður Snærós skráningarafslátt nú í maí.
„Lesist með djúpri kvikmyndatrailer röddu:Frá konunni sem færði ykkur hin sívinsælu hlaðvörp um Joe Grimson og Heiðina…
Nei ég segi svona.
Kæru vinir, í hverri viku fæ ég fyrirspurnir frá hlaðvarpsþyrstu fólki sem vill að ég segi þeim fleiri sögur og opni fleiri dularfull mál. Ábendingar um mál sem fólk vill heyra hlaðvarp um eru endalausar. Við sum þeirra segi ég „Gerðu það sjálfur góði minn“ og fæ iðulega svarið: „Ég kann það ekkert“.
Jæja nú gefst tækifærið. Innblásin af afa mínum sem galopnaði verkfærakistu sína fyrir verðandi leikara, langar mig að gera slíkt hið sama og bjóða á námskeið í haust í gerð vandaðra rannsóknar- og söguhlaðvarpa. Ég ætla að kenna allt sem ég kann og það er töluvert get ég sagt ykkur.
Ég ætla að byrja að auglýsa þetta hér á síðunni minni og bjóða 17% afslátt fyrir þau sem skrá sig í maí. Mér þætti afskaplega vænt um að þið deilduð þessu sem víðast, bæði opinberlega og í einkaskilaboðum til allra þeirra sem gætu viljað læra að gera hlaðvarp af dýrari gerðinni.
Hlekkur á þetta föstudagsdropp að hætti Beyonce, í efstu athugasemd.“
Segir Snærós í færslu á Facebook.
Um námskeiðin segir á vefsíðu Snærósar:
5 vikna námskeið um gerð hlaðvarpa sem segja sannar sögur
Námskeiðin eru fámenn, mest 7 manna, og á þeim er farið ítarlega í öll undirstöðuatriðin sem þarf að kunna til að gera gott hlaðvarp sem byggir á handriti.
Þátttakendur læra að skrifa spennandi handrit, taka viðtöl, hvernig beita á góðum rannsóknaraðferðum, tæknileg útfærsluatriði, raddbeitingu og lestur og hvernig skapa á hljóðheim sem hentar viðfangsefninu.
Námskeiðin henta öllum þeim sem hafa áhuga á vandaðri hlaðvarpsþáttagerð. Námskeiðin er í flestum tilvikum hægt að fá niðurgreidd af stéttarfélögum. Hægt er að óska eftir greiðsludreifingu hjá kennara.
