Það var fjör í Meistaradeild Evrópu í gær þegar önnur umferð í riðlakeppni kláraðist. Í H-riðli vann Manchester United 5-0 sigur gegn þýska liðinu RB Leipzig, leikið var á Old Trafford í Manchester.

Mason Greenwood kom heimamönnum yfir á 21. mínútu, staðan í hálfleik var 1-0. United gekk á lagið í seinni hálfleik. Rashford skoraði tvö mörk með tveggja mínútna millibili á 76. og 78. mínútu. Það var síðan Anthony Martial sem kom United í stöðuna 4-0 með marki úr vítaspyrnu á 87. mínútu. Marcus Rashford fullkomnaði síðan þrennu sína með marki á 90. mínútu og innsiglaði 5-0 sigur United. Liðið er með fullt hús stiga í 1. sæti riðilsins eftir tvær umferðir. RB Leipzig er í 3. sæti með 3 stig.

„Þú gerir ráð fyrir þessu frá Rashford, ég elskaði að sjá hann miskunnarlausan. Þú sást að í hvert skipti sem hann komst í gegn þá gaf hann markverðinum ekkert tækifæri,“ sagði Paul Scholes sérfræðingur BT Sport og fyrrum miðjumaður Manchester United um málið.

„Hvernig hann klárar færin hefur stundum verið gagnrýnt, ef þetta heldur svona áfram þá á hann að skora um 25 mörk á tímabilinu.“

Scholes líkti frammistöðu Rashford við gamlan liðsfélaga sinn, Ruud van Nistelrooy sem var frábær í að klára færin. „Þetta var eins og Nistelrooy í síðasta markinu, þú sérð þegar hann komast í gegn og þú veist að hann neglir boltanum í hornið.“

Enski boltinn á 433 er í boði