Tottenham er sagt hafa áhuga á að ráða Dougie Freedman sem nýjan yfirmann knattspyrnumála hjá félaginu á meðan endurskipulagning stendur yfir innan stjórnar Spurs.

Félagið hefur leitað að eftirmanni Fabio Paratici, sem lét af störfum í janúar eftir sitt annað tímabil sem yfirmaður knattspyrnumála hjá Tottenham.

Freedman vakti mikla athygli fyrir störf sín hjá Crystal Palace þar sem hann gegndi starfinu í átta ár. Á þeim tíma átti hann stóran þátt í að fá til félagsins leikmenn á borð við Michael Olise, Eberechi Eze, Marc Guehi, Adam Wharton og Dean Henderson.

Hann yfirgaf Palace árið 2025 og starfar nú hjá sádiarabíska félaginu Al-Diriyah.

Tottenham vill helst hafa nýjan yfirmann knattspyrnumála í starfi sem fyrst svo hann geti haft áhrif á val á næsta knattspyrnustjóra félagsins. Igor Tudor stýrir liðinu tímabundið fram að lokum tímabilsins.

Einnig er talið að Spurs hafi áhuga á Paul Winstanley hjá Chelsea og Tiago Pinto, sem starfar hjá Bournemouth.