Chelsea tapaði 5-2 fyrir Paris Saint-Germain í fyrri leik liðanna í 16-liða úrslitum Meistaradeildarinnar í gær.
Bradley Barcola kom PSG yfir snemma leiks en Malo Gusto jafnaði fyrir Chelsea. Ousmane Dembele kom franska liðinu aftur yfir fyrir hálfleik, áður en Enzo Fernandez jafnaði metin í 2-2.
Mistök hjá markverðinum Filip Jorgensen leiddu hins vegar til þriðja marks PSG þegar Vitinha skoraði eftir að hafa komist inn í sendingu hans. Í lokin bætti Khvicha Kvaratskhelia við tveimur mörkum og tryggði PSG stóran sigur.
Eftir leikinn sagði þjálfari Chelsea, Liam Rosenior, að Jörgensen hefði beðist afsökunar á mistökunum í klefanum.
„Leikmenn gera mistök. Filip er ekki sá fyrsti og verður ekki sá síðasti. Honum til hróss þá tók hann ábyrgð og bað liðsfélaga sína afsökunar,“ sagði Rosenior.
Hann tók jafnframt sjálfur ábyrgð á hruni liðsins undir lok leiksins.
„Síðustu 15–20 mínúturnar voru klikkaðar og það er á mína ábyrgð. Við þurfum að vera rólegri þegar áföll dynja á okkur,“ sagði hann.
Seinni leikur liðanna fer fram á Stamford Bridge 17. mars.
