Damir Muminovic hefur verið ráðinn sem einn af aðalþjálfurum 4.flokks drengja hjá Haukum. Hann er leikmaður Grindavíkur en mun einnig þjálfa hjá Haukum.

Damir er einn reyndasti leikmaður íslenskrar knattspyrnu og hefur spilað í meistaraflokki karla í tæp 20 ár, lengst af í efstu deild karla með Breiðablik hvar hann vann til fjölmargra titla. Á síðasta ári var Damir um tíma á mála hjá DPMM FC hvar hann lék 20 leiki. Damir á fjölda Evrópuleikja að baki og einnig leiki með A landsliði karla og er einmitt í hópnum sem mætir Mexíkó síðar í mánuðinum.

Damir hefur menntað sig í þjálfunarfræðunum undanfarin ár og mun næst klára KSÍ A þjálfaragráðuna. Damir tekur formlega til starfa eftir landsleikinn við Mexíkó.

„Það er gríðarlegur fengur í því að fá Damir Muminovic til starfa. Reynsla hans, þekking og gríðarlegur metnaður mun nýtast drengjunum í 4.flokki og öllu starfi knattspyrnudeildar Hauka vel og hlökkum við mikið til samstarfsins,“ segir á vef Hauka.