HK hætti við að selja leikmann norður til Þórs á Akureyri á lokadegi félagaskiptagluggans, eftir því sem fram kom í útvarpsþættinum Fótbolti.net á X-inu um helgina.

Bæði lið spila í Lengjudeildinni og eru þar í samkeppni, eru í umspilssæti um að fara upp í efstu deild. Sæbjörn Steinke, blaðamaður Fótbolta.net, sagði í þættinum að HK hafi hætt við að selja hinn unga Magnús Arnar Pétursson til Þórs í kjölfar taps gegn Selfossi á miðvikudag.

„Á lokadegi félagaskiptagluggans var orðið ljóst að Þór ætlaði sér að fá Magnús Arnar Pétursson frá HK. Það var búið að gera allt nema að skrifa undir félagaskiptin. Eftir leik ákveður HK að hleypa honum ekki í Þór,“ sagði Sæbjörn.

„Þeir voru tilbúnir að bjóða hann annað, hann fór ekki þangað. Hann er enn hjá HK, ekki í neinu hlutverki. Hann var búinn að pakka í töskur en fékk ekki að fara. Ég veit að Þór og HK eru í samkeppni, en þetta er leikmaður sem þú ert ekki að fara að nota sjálfur. Hvað er þetta? Mér finnst þetta gjörsamlega glórulaust.“

Þess má geta að Magnús byrjaði fyrir HK og lék um 70 mínútur í jafntefli gegn Grindavík í Lengjudeildinni í gær.