Við rákumst á skemmtilegan lista í dag þar sem fjallað er um harkalegustu slagsmálin í knattspyrnunni.
Fimm atvik voru tekin fyrir en eins og flestir vita er knattspyrna alls ekki íþrótt án snertinga.
Þessi tilvik eru þó langt yfir strikið og þurftu margir af þessum leikmönnum að taka út harða refsingu.
Við byrjum á sögufrægum leik Valencia gegn Inter Milan en því miður fannst ekki betra myndband af þeim slagsmálum.
1. Valencia gegn Inter Milan árið 2007
Það varð allt gjörsamlega vitlaust í 16-liða úrslitum Meistaradeildarinnar árið 2007 er þessi lið áttust við. Í leiknum sjálfum var hart barist en undir lokin þá fóru hnefarnir á loft. Fimm leikmenn voru ákærðir af UEFA og var David Navarro til að mynda dæmdur í sex mánaða bann.
2. Kieron Dyer gegn Lee Bowyer árið 2005
Það þekkja flestir þessa sögu en Dyer og Bowyer voru samherjar hjá Newcastle. Newcastle var 3-0 undir í leiknum og var nú þegar manni færri þegar þeir ákváðu að slást. Bowyer lét Dyer heyra það fyrir að gefa boltann ekki á sig.
3. Everton gegn Lyon árið 2017
Það ætlaði allt að koll um keyra í leik Everton og Lyon í Evrópudeildinni fyrir tveimur árum. Ashley Williams, leikmaður Everton, hóf þetta stríð með því að tækla Anthony Lopes, markvörð Lyon.
4. David Batty gegn Graeme Le Saux árið 1995
Eins og með Dyer og Bowyer þá voru Batty og Le Saux liðsfélagar. Þeir spiluðu með Blackburn í Meistaradeildinni og var ansi heitt þeirra á milli í leik við Spartak Moskvu. Tim Sherwood, fyrirliði Blackburn, þurfti að stöðva slagsmálin.
5. Manchester United gegn Arsenal árið 1990
Það er venjulega mikill hiti í leik þessara liða en þennan dag urðu leikmenn sér algjörlega til skammar. Fjölmargir leikmenn voru sektaðir fyrir sína hegðun og það var góð ástæða fyrir því.
